За одвикнување од пушење се одлучуваат во просек 60% жени и 40% мажи. Од оваа статистика може да се согледа дека жените генерално повеќе се грижат за своето здравје, но и за изгледот, а познато е дека пушењето негативно влијае на тенот, косата и килограмите.

Што се случува во вашиот организам кога ќе ги оставите цигарите:

– После 20 минути, крвниот притисок и пулс се враќаат во нормала.

– После 24 часа јаглеродниот моноксид исчезнува од телото.

– После 48 часа никотинот е исфрлен од вашето тело.

– Помеѓу втората и 21-вата недела се подобрува циркулацијата.

– После една година ризикот од срцев удар е намален на половина.

– После 10 години се намалува ризикот од рак на плуќа.

Дополнителен мотив да ги оставите цигарите е дека во дим од една цигара се наоѓаат околу 4000 хемикалии, а меѓу нив и 50 причинители на секакви видови рак. Според податоците на Светската здравствена организација, поради пушење, секои 6 секунди умира по една личност во светот.

Првите три дена се најтешки

Искуствата на оние кои се откажале од пушењето цигари велат дека првите три дена од откажувањето се најтешки, а од друга страна, експертите велат дека по десет дена исчезнува физичката зависност од цигари. Значи, треба само да издржите десет дена.

Потребно е да пиете многу течности во првите денови на откажувањето од цигари што ќе ви помогне да го исфрлите никотинот од организмот. Консумирајте повеќе витамин Ц (доза до 1000 мг на ден) така што во првите неколку дена пијте природни сокови од лимон, портокал, грејпфрут, но без шеќер.

Исто така, експертите советуваат дека првите пет дена е потребно повеќе да одмарате, а после јадење е препорачливо да пешачите најмалку 15 минути. Избегнете да седите во домот по јадењето затоа што тогаш вообичаено се јавува желба за цигара.