Ако ви е здосадено секоја година да купувате нови новогодишни декорации и обични, очигледни поклони на вашите најблиски, тогаш морате да пробате да ги направите овие едноставни поклони и декорации. Секој мал детал што ќе го внесете во домот од овој период од годината, ја прави потопла и попразнична просторијата. Овие слатки и креативни идеи можете да ги направите самите, а ќе ви заштедат и многу пари.
За оваа декорација ќе ви треба тегла, новогодишен украс, супер лепак или силиконски лепак, вода и светки. Украсот залепете го на капакот од теглата. Теглата наполнете ја со вода, ставете ги светките и затворете ја теглата.
Ќе ви бидат потребни дрвца, капак од кутија за чевли кој ќе го обложите со еднобојна хартија и сијалички. Залепете ги дрвцата на капакот како што се на сликата. На неколку места на капакот направете дупчиња за да можете да ги протнете сијаличките. Упалете ги сијаличките во струја и имате одлична декорација.
Ова е одличен новогодишен поклон за кој ќе ви бидат потребни еден стаклен сад, новогодишни лижавчиња, лепак, црвена машна и цвеќиња. Залепете ги лижавчињата на садот како на сликата. Околу нив врзете црвена панделка. Ставете вода во садот и свежи цвеќиња и изненадете некој посебен.
Уште еден интересен поклон. Ќе ви треба тегла, украси по желба и чоколади или бонбони. Декорирајте ја теглата по желба, наполнете ја со омилените слатки на личноста за која е поклонот, околу капакот врзете конче со порака.
Ова е одличен поклон за помалите членови на семејството. Наместо новогодишно пакетче со чоколади, изненадете ги со санката на Дедо Мраз направена од нивните омилени слатки. Ќе ви требаат две новогодишни лижавчиња и врз нив наредете ги чоколадите. Потоа врзете машна за да ги прицврстите и поклонот е готов.
Овој поклон е одличен за оние пријатели кои ги мрзи за зготват нешто, но се големи љубители на слатките работи. Тоа што треба да го направите е да ги ставите сите суви состојки од нивниот омилен колач во тегла. Измерете точно колку е потребно од секоја состојка и ставете ги една врз друга како на сликата. На ливче напишете ги инструкциите за тоа што треба да додадат (млеко, јајца..) и колку треба да го печат колачот.
Едноставна декорација за вашата трпеза оваа нова година.
Направете си сами венец за на врата. Единстевено што ќе ви биде потребно е една метална закачалка и лампиони. Следете ги чекорите на сликата.
За овој декоративен свеќник ќе ви треба поголем стаклен сад, шишарки, бели камчиња и голема свеќа. Во садот прво ставете ги камчињата, потоа ставете ја свеќата во средина, а околу неа наредете ги шишарките.
Уште еден креативен подарок за сите оние кои обожаваат да се грижат за својата кожа. Направте домашен скраб од ментол. Ќе ви биде потребно 1/2 чаша кокосово масло, 1 1/2 чаша шеќер, 1 лажичка екстракт од ментол и малку зелена боја за храна. Стопете го кокосовото масло и потоа додајте го шеќерот, екстрактот и бојата. Мешајте додека бојата е убаво измешана. Ако смесата е многу ретката додајте уште половина чаша шеќер и повторно промешајте. Ставете го скработ во тегличка и врзете машна.
Еве уште една едноставна и интересна идеја за домашна новогодишна елка. Изгледа многу убаво и празнично, а исто така, е лесна и забавна за правење!
Потребни материјали:
конус со димензии 7 см х 20 см;
ленти во две различни бои со дебелина до 1 см и должина од 5 и пол до 6 метри;
текстилна подлога за елката (може да биде подебел материјал);
иглички, шпенадли;
течен лепак и ножици
Најпрвин исечете и залепете ја кружната подлога на конусот со лепак. Употребете конус на кој ќе може да се закачат подоцна иглите. Почнете да ги сечете лентите на еднакви парчиња по 10 см. Секое парче свиткајте го на половина и прицврстете го на краевите со игла (како на сликата). Потоа боцнете ја иглата со лентата на површината на конусот (како на сликата). Започнете од доле, па се до врвот на конусот и редете ги ред една боја, па ред друга боја. Откако ќе ги наредите сите ленти на конусот, на врвот на елката залепете некој украс по желба (може да употребите украс од кеса за подароци).
Снешковци од дрво – одлична декорација што совршено ќе прилега покрај каминот или во дворот.
Потребни материјали:
Црвен, црн и портокалов материјал, трака (за шалот, очите, устата и носот на снешковците);
Течен лепак;
Тенки дрвца (за рацете на снешковците-може да ги најдете секаде во природа, шума, во двор);
Еден поголем трупец дрво (за телото) и еден потенок, помал (за капата);
Моторна пила
Исечете го големиот трупец на три дела и потоа исечете ги краевите од секој дел за да можат да се залепат лесно. Помалиот трупец исечете го во форма на капа. Сите делови залепете ги добро. Залепете ги и тенките дрвца. Исечете го портокаловиот материјал во триаголник и залепете го на снешкото, а црвената трака обвиткајте ја како шал. На крај формирајте ги очите и устата со останатиот материјал и залепете ги на дрвото.
Новогодишни елки од хартија
Најпрвин, отворете го следниот линк https://goo.gl/jjeNtq, испринтајте го листот и според тие мерки сечете ги хамерите. Може да купите хамери во различни бои по желба. Потоа според примерот, формирајте ги елките, залепете ги со течен лепак на краевите.
Откако ќе ги формирате конусите, потоа е лесно: на нив залепете копчиња, декорирајте ги со шарени маркери, со светки и со ленти. Искористете ја фантазијата.
