Овој рецепт се подготвува за помалку од 50 минути

1. Во тенџере со зовриена вода на оган ја ставаме коцката да се вари супа.
2. Во друго тенџере на оган ставаме половина од путерот да се растопи. Морковите ги сечкаме на кругови, а коренот од целер на ситни коцки. Ги пржиме на растопениот путер во тенџерето на оган.
3. Пилешките гради ги сечкаме на коцки, а рачките од магдоносот на парчиња. Ги додаваме во тенџерето и промешуваме.
4. Откако месото ќе се запржи го додаваме брашното. Мешаме со лажицата. Во тенџерето со испрженото брашно ја додаваме супата од коцка. Потоа ги додаваме цветовите карфиол, грашокот и ренданото морско оревче. Посолуваме, наросуваме бибер и промешуваме.
5. Во тава на оган го ставаме преостанатиот путер да се растопи и додаваме масло за јадење.
6. Шампињоните ги сечкаме на листови. Го ставаме да се пржат во тавата на оган. Посолуваме, наросуваме бибер и промешуваме. Запржените шампињони од тавата ги додаваме во тенџерето.
7. Јајцето го кршиме и ја делиме белката од жолчката. Жолчката и павлаката ги мешаме со жица за матење додека не се соединат. Ги додаваме во тенџерето и промешуваме. Откако шампињоните и пилешкото ќе се издинстаат го тргаме тенџерето од оган.