За овој рецепт се потребни помалку од 60 минути + 20 часа за тестото

1. Растопете го квасецот во вода на собна температура (ниту ладна, ниту топла).
2. Ставете половина од брашното и мешајте со жица за матење додека добиете кремаста смеса.
3. Потоа додајте го остатокот од брашното измешано со солта. Добро замесете го тестото со дланките подолго време (20-30 минути).
4. Потоа добро измесеното тесто ставете го во форма на топка во набрашнет сад, покријте го со крпа или со проѕирна хартија и оставете го да стасува на собна температура 6-8 часа.
5. Стасаното тесто повторно малку замесете го на набрашнета површина, потоа поделете го на три топки. Топките покријте ги повторно со проѕирна хартија и оставете ги 8-12 часа во фрижидер.
6. Потоа во тенџере на оган ставете го доматниот сос со масло, сол, бибер и свежиот босилек и гответе го 10-тина минути на умерен оган.
7. Моцарелата исечете ја на коцкички.
8. Тестата извадете ги од фрижидер и оставете ги на собна температура 30 минути.
9. Тестото расукајте го малку со сукало, а потоа развлечете го со прстите и дланките во форма на круг.
10. Потоа ставете го во топло, кружно тавче (претходно загреано на рингла околу 10-тина минути). Премачкајте го со доматниот сос, додајте ја моцарелата, босилекот и одозгора посипете малку маслиново масло.
11. Тавчето прво ставете го врз ринглата и оставете го 1-2 минути за тестото малку да набабри.
12. Загрејте ја рерната на максимум. Решетката од рерната ставете ја на најгорниот дел. Тавата од рингла префрлете ја во рерната и печете ја кратко време додека моцарелата се растопи и се потпече тестото, но внимавајте да не изгори.
13. Постапката повторете ја со сите теста.