За овој рецепт се потребни помалку од 150 минути

1. Свинското каре засечете го на повеќе места, зачинете го со сол и бибер и свиткајте го во ролат, оставајќи го да ги впие зачините.
2. Коцката за супа сварете ја во зовриена вода во тенџере на оган.
3. Една главица кромид пржете ја на загреано маслиново масло во тава на оган, па кога ќе омекне додајте ги сечканите рачки од целер, 2 чешниња ситно сечкан лук и излупените и на коцки исечкани јаболки. Покријте со капак и динстајте.
4. Откако јаболките во тавата ќе омекнат, додајте 2/3 од мешавина од сечкан магдонос, мајчина душичка и рендана кора од лимон.
5. Зачинете и со сол и бибер по вкус, промешајте и тргнете ја тавата од оган.
6. Додајте 1 црпалка од супата, 30 мл вино и лебните трошки.
7. Измешајте го филот и нанесете го врз одвитканото свинско каре, па повторно свиткајте во ролат и зацврстете го со готварски конец.
8. Зачинете го ролатот од сите страни со сол и бибер, па извалкајте го во преостанатата мешавина од мајчина душичка, магдонос и кора од лимон.
9. Преостанатиот кромид и 2 чешниња лук ситно исечкајте ги и ставете ги во керамичка тава, па додајте сечкани моркови, корен од целер, домат и сечкана пиперка на ситно.
10. Врз зеленчукот во тавата додајте го ролатот.
11. Додајте ги преостанатата супа, сокот од јаболко и преостанатото вино, попрскајте го ролатот со маслиново масло и тавата затворете ја со алуминиумска фолија.
12. Печете 2 часа во рерна на 200 степени.
13. На печениот ролат извадете му го готварскиот конец, зеленчукот и течноста од тавата измиксирајте ги во блендер, па прелијте ги врз ролатот и послужете го.