За овој рецепт се потребни помалку од 50 минути

1. Морковите и зелката исечкајте ги на тенки долгнавести парчиња, а магдоносот и чешнето лук ситно исечкајте ги.
2. Исечканиот лук пржете го на загреано масло во вок тава на оган, промешајте, додајте ги морковите и откако ќе се запржат, содржината од тавата истурете ја во цедалка.
3. Исцедените парчиња моркови со лук ставете ги во длабок сад, маслото вратете го во вок тавата на оган и на него пропржете ја зелката.
4. Откако ќе омекне зелката, додајте го грашакот, па потоа во тавата вратете ги лукот и морковите.
5. Откако целиот зеленчук ќе се испржи, додајте ги чили и соја сосот и содржината од тавата истурете ја во цедалка.
6. Маслото вратете го во вок тавата на оган и пржете го меленото месо. Зачинете го со сол, може и вегета, додајте сечкан магдонос и промешајте.
7. Исцедете го месото во цедалката и додајте го во длабокиот сад со претходно исцедениот зеленчук, па добро промешајте го филот.
8. Готовите кори исечете ги на четвртинки, со четка со вода премачкајте го едниот крај на првото парче кора, врз спротивниот крај на кората нанесете од филот, преостанатите два краја свиткајте ги кон внатрешноста и свиткајте ја ролничката.
9. На истиот начин се подготвуваат сите ролнички, па се пржат во загреано масло во тава на оган, а откако ќе поруменат, ставете ги врз салфетка да се исцедат од вишокот маснотија.
10. Сервирајте ги со свежа салата по избор.