За овој рецепт се потребни помалку од 90 минути

1. Најпрвин одделете 85 грама од путерот и оставете го на собна температура да омекне. Останатата количина на путер оставете ја во фрижидер бидејќи ќе ви треба ладна.
2. Тестото: во сад ставете 140 г ладен путер, исечкан на коцки, 100 г шеќер, 200 г брашно, рендана кора од 1 лимон и малку сол. Матете со миксер додека се направат грутки, а потоа додајте 1 жолчка од јајце. Продолжете да матите за да добиете изедначена смеса.
3. Смесата од садот префрлете ја на набрашнета површина, по потреба додавајте уште малку брашно за да замесите средно тврдо тесто. Изработеното тесто оформете го во топка, завиткајте го во проѕирна фолија и оставете го да отстои во фрижидер 1 час.
4. Во меѓувреме подгответе го кремот од лимон:  млекото ставете го во длабока тава на оган. Трите јајца изматете ги во посебен сад со миксер заедно со 100 г шеќер и прстофат сол. По неколку минути додајте ја ренданата кора од 1 лимон и измешаните 1 лажица нишесте и 1 лажица брашно. Продолжете да матите уште неколку минути.
5. Кога млекото ќе почне да врие, земете 1/2 чаша од него и додајте го во смесата со јајцата. Мешајте со лажица и потоа целата смеса додајте ја во тавата со млеко. Оставете да се згусне смесата на умерен оган, а кога ќе проврие, мешајте енергично и за кратко време смесата ќе се згусне.
6. Тргнете од оган кога ќе се згусне, додајте 50 г ладен путер исечен на коцки и исцеден сок од 1 лимон. Измешајте ја смесата и тргнете ја во сад настрана да се олади на собна температура.
7. Во меѓувреме подгответе го кремот од бадеми: бадемите сомелете ги (или користете брашно од бадеми). Потоа измешајте ги со 85 г шеќер, 85 г омекнат путер, 1 јајце и ренданата кора од 1 лимон. Мешајте со миксер или со жица за матење за да добиете густ крем.
8. Рерната загрејте ја на 180 степени.
9. Тестото расукајте го на набрашнета површина во кружна кора со околу 4-5 мм дебелина.
10. Потоа ставете го во кружен калап за печење (претходно намачкан со путер и набрашнет) со пречник 24 см и убаво распоредете го тестото. Треба малку да излегува на краевите од калапот,  па потоа со сукало исечете ги краевите.

11. Површината избодете ја во виљушка, ставете од оладената крема од лимон и убаво распоредете ја низ тестото. Потоа со лажица црпете од кремот од бадеми и распоредете го врз слојот од кремата од лимон.

12. Печете го тартот во загреаната рерна на 180 степени околу 35-40 минути додека убаво зарумени.

13. Оставете да се олади, посипете ја со шеќер во прав и декорирајте со листови бадеми.