За овој рецепт се потребни помалку од 100 минути

КРЕМ:

1. Костените измијте ги под млаз вода и потоа ставете ги во тенџере со зовриена вода да се варат околу 15 минути. Излупете ги и оставете ги малку да се подоладат, па потоа сомелете ги.
2. Ванила стапчето поминете го во внатрешноста и со помош на нож извадете ги семињата, а потоа стапчето со семињата ставете ги во длабоко тенџере. Додајте 600 грама шеќер и 650 милилитри вода и гответе на умерен оган. Мешајте со жица додека се растопи шеќерот, околу 10 минути.
3. Откако шеќерот целосно ќе се растопи, извадете го ванила стапчето и додајте ги сомелените костени и рендана кора од 1 лимон.
4. Убаво промешајте и соединете ја смесата, а потоа гответе на тивок оган 1 час. Мешајте со дрвена лажица одвреме навреме.

МАФИНИ:

1. Рерната загрејте ја на 200°C.
2. Јајцата скршете ги и одделете ги жолчките од белките.
3. Со миксер пенасто изматете ги белките. Жолчките измешајте ги со 220 грама шеќер, па додајте го омекнатиот путер, јогуртот и млекото и мешајте со жица додека не добиете хомогена смеса.
4. Брашното измешајте го со печивото и додајте ги со смесата од жолчки. Убаво промешајте и на крај додајте ги изматените белки. Промешајте внимателно со дрвена лажица.
5. Смесата распоредете ја во силиконски сад за мафини помалку од половина (со оваа доза би ви испаднале околу 20 мафини). Во секој мафин додајте по две полни лажици од кремот од костени, па повторно додајте од смесата за мафини. Вишокот крем од костени ставете го во тегли и користете го по потреба.
6. Печете ги мафините во загреаната рерна 15-тина минути.