Овој рецепт се подготвува за помалку од 120 минути

1. Млекото се топли заедно со шеќерот, да биде млако. Се додава ванилата и се меша додека се стопи шеќерот. Во млакото млеко се рони квасецот. Во друг сад се става брашното, се додава маргаринот, солта, жолчките, маслото и кората од лимон. Се додава млекото и се замесува тестото за козинакот.
2. Тестото се остава 1 час да нарасне. Потоа повторно се размесува и се дели на 4 еднакви дела.
3. Од трите дела се прави венецот. Едното топче се дели на 4 еднакви дела. Од трите дела се прави рачката на корпата, а од едниот дел се прави дното на корпата.
4. Прво се изработува дното на корпата. Едното топче се дели на 8 еднакви дела. Се прават ленти-тркалезни 8, 4 за долу и 4 за горе. Се плетат како мрежа и се поставуваат на дното од тава намачкана со маргарини посипана со брашно.
5. Венецот за корпата се прави од трите најголеми топчиња. Сите три топчиња се развлекуваат во вид на ролат и се обликуваат да бидат со иста должина и со иста дебелина.
6. Сувото грозје се става на средина од лентата и повторно се обликуваат. Се поставуваат на средината од масата, треба да бидат долги околу 1м. Се почнува со плетење на плетенката од средина.
7. Се исплетува едната половина, а при крај не се плете, се остава околу една педа за да се спои венецот. Се поставува во тавата и се остава да стаса 1 час.
8. Рачката за корпата се прави од трите дела. Се обликуваат како ролат (цилиндрични ленти), во нив не се става суво грозје. Се плете плетенка во должина соодветна на венецот. Стаклен сад со полукружно дно (обратно свртен) се премачкува со маргарин и брашно во дебелина на плетенката. Се поставува плетенката.
9. Додека стасува корпата неколку пати се премачкува со масло. Откако ќе стаса, велигденската корпа се премачкува со смесата за премачкување (1 жолчка, неколку капки масло, млеко, вода), одозгора се ставаат парченца маргарин и се пече во загреана рерна на 180 степени.
10. По печењето средината од венецот се засекува со нож и се прицврстува рачката на корпата. Се декорира по желба и се полни со велигденски јајца.